Բնապահպանության նախարարությունը եւ էներգետիկայի եւ բնական պաշարների նախարարությունը չեն զբաղվում Հայաստանի պոչամբարների, հանքերի եւ թունավոր լցակույտերի սեյսմիկ անվտանգության հարցերով: Այս մասին տեղեկացրեցին նախարարությունները` պատասխանելով «ԷկոԼուր»-ի հարցմանը, թե ով է գնահատելու Հայաստանում 15 գործող պոչամբարների, 400 շահագործվող հանքերի եւ միլիոնավոր տոննաների հասնող թունավոր լցակույտերի սեյսմիկ խոցելությունը, ինչքանով է ապահովված այդ օբյեկտների սեյսմիկ անվտանգությունը, արդյոք նոր հանքավայրերի շահագործման նախագծերում (օրինակ` Թեղուտի պղնձամոլիբդենային հանքավայրի, Ամուլսարի ոսկու հանքավայրի նախագծեր) կամ հանքարդյունաբերության ծավալների ընդլայնման ծրագրերում (օրինակ` Սոտքի ոսկու հանքավայր, Քաջարանի պղնձամոլիբդենային հանքավայր, Շահումյանի ոսկու հանքավայր) ներկայացված է սեյսմիկ խոցելիության գնահատումը:
Նշենք, որ էներգետիկայի եւ բնական պաշարների նախարարությունն իր նամակում հղում է կատարել «Ընդերքի մասին» ՀՀ օրենսգրքի 7-րդ հոդվածի վրա, ըստ որի ընդերքօգտագործման նախագծերը ենթարկվում են պետական փորձաքննության եւ ընդերքօգտագործման թույլտվությունը տրվում է փորձաքննության դրական եզրակացության դեպքում: ՀՀ բնապահպանության նախարարությունը իր պատասխանում հղում է անում «Ընդերքի մասին» ՀՀ օրենսգրքի 50-րդ հոդվածի վրա, որտեղ նշված են օգտակար հանածոյի արդյունահանման նախագծի պահանջները: Վերոնշյալ երկու հոդվածներում սեյսմիկ անվտանգությանն առնչվող ոչ մի կետ չկա:
Սույն հարցումը «ԷկոԼուր»-ն ուղարկել է նաեւ ՀՀ արտակարգ իրավիճակների նախարարություն, սակայն դեռ պատասխան չի ստացել:
