 Կառավարությունը սահմանեց
հանքարդյունաբերության ոլորտում ՀՀ բնապահպանության նախարարության`
շրջակա միջավայրի պահպանման իրավասությունները: Ապրիլի 19-ին ՀՀ
կառավարությունը փոփոխություններ եւ լրացումներ մտցրեց 2002թ. օգոստոսի 8-ի
«Հայաստանի Հանրապետության բնապահպանության նախարարության աշխատակազմի
պետական կառավարչական հիմնարկ ստեղծելու և Հայաստանի Հանրապետության
բնապահպանության նախարարության կանոնադրությունն ու աշխատակազմի
կառուցվածքը հաստատելու մասին» N1237-Ն որոշման մեջ, որով սահմանվեց
Բնապահպանության նախարարության իրավասությունները ընդերքօգտագործման
դեպքում: Փոփոխությունը պայմանավորված է «Ընդերքի մասին» ՀՀ նոր
օրենսգրքով: Ըստ այդմ Բնապահպանության նախարարությունը պետք է իրականացնի`
· ընդերքօգտագործման բնագավառում բնության
և շրջակա միջավայրի պահպանության նորմերի, պայմանների ու պահանջների
կատարման նկատմամբ պետական վերահսկողություն
· ընդերքօգտագործման նախագծերի, ծրագրերի,
հանքարդյունահանման համալիրի ապամոնտաժման, հանքավայրերի կոնսերվացման,
փակման և հրաժարման նախագծերի շրջակա միջավայրի վրա ազդեցության
փորձաքննություն
· բնության և շրջակա միջավայրի վրա
ազդեցության գնահատման փուլում բնության և շրջակա միջավայրի նկատմամբ
մշտադիտարկումների պլանի կամ ծրագրի հաստատում
· ընդերքի օգտագործման հետ կապված
բնության և շրջակա միջավայրի պահպանության ՀՀ օրենսդրությամբ նախատեսված
սահմանափակումների կիրառում
· հանքարդյունահանման համալիրի
ապամոնտաժման, հանքավայրերի կոնսերվացման, փակման և հրաժարման նախագծերի,
ծրագրերի կատարման նկատմամբ բնապահպանական վերահսկողություն
· բնության և շրջակա միջավայրի
պահպանության դրամագլխի օգտագործման, հատկացումների չափերի հաշվարկման,
ռեկուլտիվացիոն աշխատանքներ իրականացնելու վերաբերյալ որոշումների
ընդունում
· երկրաբանական ուսումնասիրության
ծրագրերի վերաբերյալ բնության և շրջակա միջավայրի վրա ազդեցության նախնական
գնահատման եզրակացությունների տրամադրում:
| 
