2011թ ամռանը գրանցվել է Արկտիկայի սառույցների հալման ծավալների ամենամեծ ցուցանիշը վերջին 1450 տարիներին: Նման եզրակացության են եկել Քվեբեկի համալսարանի երկրաբանները, ովքեր արդյունքը ստանալու համար ուսումնասիրել են ավելի քան 60 աղբյուրներ` այդ թվում, երկրաբանական փորձանմուշներ, հին նավամատյաններ եւ այլն, գրում է ԻՏԱՐ-ՏԱՍՍ-ը:
Գիտնականներն ուսումնասիրության արդյունքում եկել են եզրակացության, որ մ.թ. 600թ Արկտիկայի տարածքը կազմել է 8,5 մլն ք/կմ: Այս տարի սառցապատ տարածությունները հասել են պատմական նվազգույնի` 4,24 մլն ք/կմ:
Նշվում է, որ արկտիկական սառույցների հալման գործընթացը ընթանում է ինչպես մակերեսային, այնպես էլ ստորջրյա հատվածում, ինչը հետեւանք է կլիմայի, ծովային ջրի ջերմաստաիճանի եւ ջրի աղիության աստիճանի փոփոխության: Եթե նախկինում սառցահալը տեղի էր ունենում միայն ծովային տաք հոսանքների ազդեցությամբ, ապա այժմ դրա վրա մեծ ազդեցություն է թողնում նաեւ մթոնոլորտի տաքացումը:
