ԵՊՀ «Վարդանանք» ռազմահայրենասիրական դաստիարակության ակումբի անդամները, ավանդույթի համաձայն, համալսարանական զոհված ազատամարտիկների ծննդյան ու մահվան օրերին այցելում են նրանց շիրիմներին ու ծննդավայրեր:
Ապրիլի 21-ին Արեգում` այժմ իր հերոս զավակի անունը կրող Թաթուլ գյուղում, սպասում էին համալսարանականներին: Նախորդ օրը` վաղ առավոտյան, Միջազգային հարաբերությունների ֆակուլտետի մի խումբ ուսանողներ Երեւանի Սուրբ Սարգիս առաջնորդանիստ եկեղեցում օրհնություն ստանալուց հետո ճանապարհ ընկան դեպի Թաթուլ գյուղ:
Ազգային ու հայրենասիրական երգեր երգելով, Թաթուլի գրած բանաստեղծություններն ասմունքելով` ուղիղ քսանհինգ ժամ հետո ուխտավոր համալսարանականներն արդեն Ազգային հերոսի ծննդավայրում էին, որտեղ Թաթուլի հարազատները, մարտական ընկերներն ու վարդանանքցիներն իրենց հարգանքի տուրքն էին մատուցում Թաթուլ Կրպեյանի հիշատակին:
«Դասը վարում են համալսարանականները» ծրագրի շրջանակում «Վարդանանք» ակումբի անդամները գյուղի` Թաթուլ Կրպեյանի անունը կրող դպրոցում ռազմահայրենասիրական դաս վարեցին: Հատկանշական է, որ այս դպրոցի անգամ ցածր դասարանների աշակերտներն ապրում են թաթուլյան ոգով. նրանք հպարտությամբ էին նշում, որ իրենք Ազգային հերոս Թաթուլ Կրպեյանի համագյուղացիներն են:
Նշենք, որ նախորդ տարվա նոյեմբերին Միջազգային հարաբերությունների ֆակուլտետի 2-րդ կուրսի ուսանող Էդգար Էլբակյանն ու իր երկու ընկերները` Գոռ Նազարյանն ու Էրիկ Դավթյանը, Էդգարի նախաձեռնությամբ Թալինից ոտքով քայլել են մինչեւ Թաթուլ գյուղ: Այս տարի տղաներին էին միացել նաեւ նրանց հինգ ընկերները. խմբի միակ աղջիկը Վարդինեն էր, ով իր ընկերուհիներին հորդորում է միանալ այդպիսի արշավներին:
