Գլխավոր էջ » 2012 » Ապրիլ » 4 » Ցեմենտի փոշին եւ ցիանիդը մշտապես Արարատի մթնոլորտում են
19:02
Ցեմենտի փոշին եւ ցիանիդը մշտապես Արարատի մթնոլորտում են
Ամեն օր Արարատ քաղաքի բնակիչները շնչում են ցեմենտի փոշու խառնուրդ` հարստացված ծծմբային անհիդրիդով, ջրածնային ցիանիդով, ազոտի օքսիդով, երկաթի, մանգանի, սիլիցիումի, կալցիումի, ալյումինի միացություններով… Աղտոտման աղբյուրներն են ցեմենտի գործարանը, ոսկու կորզման ֆաբրիկան, ասբեստ-շիֆերի կոնստրուկցիաների գործարանը, կրի արտադրությունը, ասֆալտի արտադրությունը, բաց հանքավայրերը: Արդյունքում Արարատում արձանագրված են մասնագիտական հիվանդություններ` սիլիկոզ, պնեւմոկոլոզ, բրոնխիտ, ասթմա, պլեւրիտ եւ այլն: 2004թ. տվյալներով` բնակչության 14%-ը տառապում էր քրոնիկ հիվանդություններով եւ հաշմանդամություն ունեին: Հաշմանդամների թվում երեխաները կազմում էին 2,9%: «Շատ մարդիկ չգիտեն, թե ինչ խնդիր ունեն: Արարատի ցեմենտի գործարանը գործում է 1931 թվականից, բայց մինչեւ հիմա տարեց մարդիկ տեղյակ չեն, թե ինչ վնասակար ազդեցություն այն ունի, որովհետեւ դա իրենց հետաքրքիր չի եղել,- ասում է Արարատ քաղաքի ակտիվիստներից մեկը,- իսկ այսօր ոչ միայն մեզ համար, այլեւ ամբողջ աշխարհի համար բնապահպանական խնդիրները դառնում են թիվ մեկ»: Նա կարծում է, որ հասել է ժամանակը, որպեսզի մարդիկ պայքարեն իրենց իրավունքների համար: Մյուս ակտիվիստն էլ ասում է. «Մենք ջանում ենք, որ ստիպենք Արարատի ցեմենտի գործարանին գոնե մինիմումի հասցնի քաղաքին պատճառվող վնասը, գոնե աշխատեցնի զտիչ սարքերը: Եթե սոցհարցումներ իրականացնենք, կտեսնենք, որ քաղաքի բնակչության մեծ մասը ալերգիաներով ու ասթմաներով է տառապում»:
