Աշխարհում իր հզորությամբ 4-րդ ոսկի արդյունահանող «Gold Fields» ընկերությունը` Հարավաֆրիկյան Հանրապետությունից, դադարեցնում է իր գործունեությունը Ղրղզստանում այնքան ժամանակ, մինչեւ կառավարության կողմից չապահովվի իր աշխատանքի անվտանգությունը: Կարելի է ենթադրել, որ ներդրողը ստիպված կլինի շատ երկար սպասել կարգ ու կանոնի հաստատմանը: Երկրի ղեկավարությունը դեռ որեւէ ստույգ քայլ չի առաջարկում` լուծելու օտարերկրյա արդյունահանող ձեռնարկություների հետ մարդկանց մի որոշակի խմբի բազմաթիվ կոնֆլիկտները:
Հոկտեմբերի 7-ի լույս 8-ի գիշերը մոտ 10 զինված ձիավորներ հարձակվել են ընկերության երկրահետախուզական ճամբարի վրա:
Ինչպես հայտնի է դարձել, հրդեհի ընթացքում այրվել է 11 քոթեջ, որտեղ ապրում էին ընկերության աշխատակիցները, եւ 3 պահեստարան: Հրդեհի ընդհանուր տարածքը կազմել է 1000-ից ավելի քմ: Հրդեհի մեկուսացման համար ուղարկվել է երկու մարտական հաշվարկ, որոնց միայն 3 ժամ անց է հաջողվել մարել հրդեհի օջախը:
Ոչ ոք իրեն մեղավոր չի համարում: Իրենց հանցավոր արարքից հետո Արալ գյուղի որոշ բնակիչներ Բիշկեկում մամուլի ասուլիս են հրավիրել:
Մասնակիցներից մեկը հայտարարել է, որ գյուղացիները ստորագրություններ են հավաքել երկրաբանահետախուզական աշխատանքների դեմ: «Մենք` Արալ գյուղի բնակիչներս, դժգոհ ենք «Տալաս Քոփեր Գոլդ» ընկերության գործունեությունից, 1200 ստորագրություն ենք հավաքել` դադարեցնելու ինչպես երկրաբանահետախուզական աշխատանքները, այնպես էլ հանքի շահագործումը: Այս ընթացքում հորատման աշխատանքները հսկայական վնաս են հասցրել էկոլոգիային»:
