Գլխավոր էջ » 2012»Ապրիլ»4 » ՀՀ առողջապահության նախարարությունը խուսափում է պատասխանել սուր եւ էական հարցերին
19:03
ՀՀ առողջապահության նախարարությունը խուսափում է պատասխանել սուր եւ էական հարցերին
ՀՀ առողջապահության նախարարությունը կամ տեղեկություն չունի էկոլոգիապես աղտոտված տարածքներում ապրող բնակչության առողջական վիճակի մասին, կամ այդ տեղեկություններն այնքան վատն են, որ նախարարությունը թաքցնում է: Լոռու եւ Սյունիքի մարզերի` ծանր մետաղներով եւ տոքսիկ տարրերով աղտոտված տարածքներում ապրող բնակչության առողջական վիճակի վերաբերյալ «ԷկոԼուր»-ը 2 հարցում է ուղարկել Առողջապահության նախարարություն: Նախարարությունը 2011թ. հուլիսին «ԷկոԼուր»-ին տեղեկացրել էր, որ «անցկացնում է օդի, ջրի, հողի եւ բուսականության աղտոտվածության հետազոտություններ, ինչպես նաեւ բնակչության վրա շրջակա միջավայրի աղտոտվածության ազդեցության ուսումնասիրություններ», եւ որ արդյունքները կհայտնեն ավելի ուշ: Բայց այդպես էլ որեւէ տվյալ չներկայացվեց: Հաջորդ հարցումով «ԷկոԼուր»-ը խնդրեց պատասխանել, թե այդ ուսումնասիրությունների համար պետական բյուջեից որքան գումար է հատկացվել, ինչ փուլում են նախարարության հետազոտությունները, որ համայնքներն են արդեն իսկ ուսումնասիրված եւ ինչ արդյունքներ են ստացվել:
ՀՀ առողջապահության նախարարության աշխատակազմի ղեկավար Սուրեն Քրմոյանի ստորագրությամբ 15.03.2012թ. թիվ ՍՔ/2072-12 պատասխան նամակում նշված է. «Ներկայում ՀՀ առողջապահության նախարարության մասնագետների կողմից իրականացվում են ՀՀ բնակչության հիվանդացության վիճակագրական ուսումնասիրություններ: Կատարված աշխատանքների վերաբերյալ Ձեզ լրացուցիչ կտեղեկացվի մոտակա մեկ շաբաթվա ընթացքում»: Արդեն երկու շաբաթ է անցել, բայց որեւէ տեղեկություն «ԷկոԼուր»-ը նախարարությունից դեռ չի ստացել: Տեղեկատվություն չկա, էկոլոգիական ահազանգերի վայրերում բժիշկները մարդկանց հարցերին չեն պատասխանում, իսկ մարդիկ որեւէ պատկերցում չունեն, որ իրենց մոտ բնակչության հիվանդացության վիճակագրական ուսումնասիրություններ են կատարվում:
