Ոստիկանությունը պարզել է Երեւանի Ազատության պողոտայի թիվ 12 շենքի պուրակում 11 ծառ հատողի ինքնությունը: Ոստիկանության մամուլի ծառայությունից NEWS.am-ին հայտնում են, որ ոստիկանության ծառայողները Ազատության պողոտայի թիվ 12/1 եւ 12/2 շենքերի հարակից տարածքում հայտնաբերել են 11 ծառաբուն: Պարզվել է, որ ծառերը ապօրինի հատել է 39-ամյա Արտակ Կ.-ն: Նա ոստիկանությունում բացատրություն է տվել, որ նշված տարածքը Երեւանի քաղաքապետի որոշմամբ` աճուրդային վաճառքով, սեփականության իրավունքով հատկացվել է իրեն` երկհարկանի հասարակական սպասարկման օբյեկտ կառուցելու համար: Առուվաճառքի պայմանագրի հիման վրա՝ 2011 թ. նոյեմբերի 11-ին, տրվել է սեփականության վկայական, եւ տարածքում շինարարական աշխատանքներ սկսելու նպատակով, առանց համապատասխան թույլտվության, 11 ծառերը հատվել են իր նախաձեռնությամբ: Նշանակվել է փորձաքննություն: Կատարվում է հետաքննություն: Ավելի վաղ NEWS.am-ը հայտնել էր, որ Ազատության պողոտա 12/1 հասցեում, փետրվարի 19-ին, գտնվող պուրակում ապօրինի ծառահատում է իրականացվել: Ըստ Երեւանի քաղաքապետարանի մամուլի ծառայության, տեղազննության արդյունքում պարզվել էր, որ հատվել 6 կենսունակ ծառ, որոնցից 3-ը թույա ծառատեսակի ` կոճղի 10,12 եւ 13 սմ տրամագծերով, 1 հատ հացենի եւ 2 թեղի` կոճղի համապատասխանաբար 19, 15 եւ 11 սմ տրամագծերով: Ապօրինի ծառահատման փաստի առթիվ կազմվել է համապատասխան արձանագրություն եւ քաղաքապետարանը համապատասխան գրությամբ դիմել է ՀՀ բնապահպանության նախարարության բնապահպանության պետական տեսչության Երեւան քաղաքի բնապահպանության տեսչություն եւ ՀՀ ոստիկանության Երեւան քաղաքի վարչության Քանաքեռ-Զեյթուն բաժնին` համապատասխան ընթացք տալու համար:
|