Այսօրվա դրությամբ Սեւանա լճի ջրի թափանցելիության ֆոնը 6-10 մետր է, ինչը նկատելի աճ է: Ազգային ժողովում պատասխանելով Սեւանի հիմնախնդիրների վերաբերյալ պատգամավոր Լարիսա Ալավերդյանի հարցին' այս մասին հայտարարեց ՀՀ բնապահպանության նախարար Արամ Հարությունյանը:
Նախարարը նշեց, որ ամեն տարի հաստատվում է Սեւանա լճի էկոհամակարգի պահպանման, վերարտադրման միջոցառումների ծրագիր, ինչից հետո այն ներկայացվում է Ազգային ժողովի հաստատման:
«Ինչ վերաբերում է մաքրման կայաններին եւ աղտոտվածության խնդրին, ապա պետք է նշեմ, որ 2010թ-ին մեկնարկել են Վարդենիս, Գավառ, Մարտունի մաքրման կայանների կառուցման աշխատանքները, որոնք կավարտվեն 2012 թ.»,- ասաց Ա.Հարությունյանը:
Այսօրվա դրությամբ մաքրված է 1360 հա ափամերձ տարածք: Աշխատանքներ են ծավալվել նաեւ ջրի տակ, որտեղ մաքրվել է 165 հա տարածք:
| 
|
«Ընդ որում' այդ աշխատանքների ընթացքում օգտագործվել է այն տեխնիկան, որն այս տարի է ձեռք բերվել»,- նշեց Բնապահպանության նախարարը:
Անդրադառնալով Սեւանում ձկնաբուծության խնդրին' Ա.Հարությունյանը նշեց, որ այս տարի դեռեւս լիճ մանրաձուկ բաց չի թողնվել: Մինչ օրս շուրջ 1 մլն մանրաձուկ է լիճ բաց թողնվել: «Համաձայն վերջին հաշվետվությունների' նկատվել են գեղարքունի եւ ամառային իշխան տեսակների առանձնյակներ»,- ասաց նախարարը:
|
