Հայաստանում որսագողությունը բիզնես չէ, այլ ժամանակ անցկացնելու միջոց: Այս մասին «ԱրմԻնֆո»-ի հետ զրույցում ասաց WWF-Հայաստանի ղեկավար Կարեն Մանվելյանը: «Որսագողության հետ բախվում են երկրի բոլոր մարզերը: Ես ականատես եղա, թե ինչպես Թռչկան ջրվեժի մոտ գիշերը ջիպեր եկան, որս անելու փորձեր արեցին: Տեղի բնակիչների խոսքերով` նախկինում այնտեղ այծյամներ, արջեր էին հանդիպում: Իսկ հիմա նրանք գործնականորեն չկան»,- պատմեց նա:
Փորձագետի կարծիքով` Հայաստանում որսագողությունը բիզնես չէ, այլ ավելի շուտ ժամանակ անցկացնելու միջոց:
| 
|
«Անօրինական որսով հիմնականում զբաղվում են մարդիկ, ովքեր փող ունեն: Որսագողերն ավելի շատ են, քան որսորդները, քանի որ դա թանկ հաճույք է»,- ընդգծեց նա: Որսագողության զարգացման մեջ իրենց ներդրումն ունեն նաեւ տեղի բնակիչները, որոնցից ոմանք զբաղվում են Երեւանի եւ այլ քաղաքների բնակիչների համար որսի կազմակերպմամբ:
Ինչ վերաբերում է հարավային հատուկ պահպանվող տարածքներին, ապա այստեղ որսագողության հնարավորությունը Մանվելյանը կասկածի ենթարկեց. «Մենք աշխատում ենք Խոսրովի եւ Շիկահողի արգելոցների, «Արեւիկ» ազգային պարկի, «Զանգեզուր» արգելավայրի հետ, եւ այստեղ որսագողություն չկա: Երբեմն կարող են մասնավոր դեպքեր լինել, բայց դրանք արագ կանխվում են հատուկ պահպանվող տարածքների աշխատակիցների, բնապահպանական տեսչության, ոստիկանների հետ արդյունավետ համագործակցության շնորհիվ: Նման փորձ պետք է լինի նաեւ Հայաստանի այլ մարզերում, հատկապես Վայոց Ձորում, որտեղ մեր կենսաբազմազանությունը շատ հարուստ է»,- նշեց Մանվելյանը:
|
