Ֆակուլտետի մի շարք դասախոսներ, ուսանողներ եւ ասպիրանտներ տարբեր ժամանակներում գիտակրթական նպատակներով Գերմանական ակադեմիական փոխանակման ծառայության (DAAD) ֆինանսավորմամբ այցելել են Գերմանիա: Այսօր նրանք հյուրընկալել էին DAAD-ի տեղեկատվական գրասենյակի ղեկավար Թինա Լաուֆերին եւ նրա խորհրդական Մերի Նավասարդյանին:
Հանդիպումը նախաձեռնել էին DAAD-ի ծրագրերով 2010 թ-ին Կոնստանցի համալսարան մեկնած ուսանողներն ու դասախոսները: «Սոցիոլոգիայի ֆակուլտետի ներկայացուցիչները մասնակցել են DAAD-ի կողմից ֆինանսավորվող մի շարք ծրագրերի: Այսօրվա հանդիպման հիմնական նպատակը մեր` գերմանական բուհերի հետ համագործակցության արդյունքում ստացված ձեռքբերումները DAAD-ին ներկայացնելն է»,- պարզաբանում է ֆակուլտետի դասախոս Աննա Ալեքսանյանը:
Իր ողջույնի խոսքում ԵՊՀ սոցիոլոգիայի ֆակուլտետի դեկան Արթուր Մկրտիչյանը կարեւորեց DAAD-ի հետ ֆակուլտետի համագործակցությունը` առանձնացնելով հատկապես Կոնստանց կատարած այցելությունը, որը նախաձեռնել էր ֆակուլտետի շրջանավարտ Անուշ Եղիազարյանը: Նա այսօր էլ սովորում եւ աշխատում է Կոնստանցի համալսարանում:
«Մինչ Կոնստանցի ծրագիրը ֆակուլտետից միշտ անհատ դասախոսներ էին մեկնում Գերմանիա: Կոնստանց կատարած խմբային այցելությամբ մեր ֆակուլտետի համար մի նոր էջ բացվեց, ու այսօր արդեն DAAD-ի շնորհիվ ֆակուլտետը Գերմանիայում գիտակրթական փորձ ունեցող ուսանողների եւ դասախոսների խումբ ունի»,- նշեց Արթուր Մկրտիչյանը:
Ֆակուլտետի ներկայացուցիչների հաշվետու ելույթներից առաջ հյուրերը հակիրճ ներկայացրեցին DAAD-ն, դրա գործառույթներն ընդհանրապես եւ մասնավորապես Հայաստանում: Թինա Լաուֆերը պատմեց նաեւ առաջիկա տարվա համար նախատեսված կրթաթոշակների մասին, պատասխանեց ներկաների հարցերին: «Հայաստանցիների համար նախատեսված DAAD-ի կրթաթոշակների թիվը տարեցտարի աճում է, եւ ես ուրախ կլինեմ, եթե ԵՊՀ սոցիոլոգիայի ֆակուլտետի ներկայացուցիչները կարողանան օգտվել այդ ծրագրերի տված հնարավորություններից»,- ասաց Թինա Լաուֆերը:
Հանդիպման երկրորդ հատվածում ֆակուլտետի ներկայացուցիչները ամփոփ ցուցադրությամբ հյուրերին պատմեցին իրենց գիտակրթական այցելության, դրա նպատակների ու ստացված արդյունքների մասին:
