| Եթե Ջերմուկից ուղիղ շառավղով 12 կմ հեռավորության վրա գտնվող Ամուլսարի ոսկու հանքավայրի շահագործումը վնասի Ջերմուկի` որպես առողջարանային քաղաքի գոյությանը, ապա այն չի կարող շահագործվել: NEWS.am-ի հետ զրույցում նման հայտարարություն արեց Ջերմուկի քաղաքապետ Վարդան Հովհաննիսյանը: «Հրավիրել ենք անկախ փորձագետներ, քննարկումները գնում են, նաեւ հրավիրել եմ բնապահպաններին` «Էկոլուրին», որ մեզ հետ միասին աշխատեն եւ օժանդակեն, ու եթե այդպիսի խնդիր առաջանա` արգելք հանդիսանանք»,- ասաց Վ. Հովհաննիսյանը: | 
|
Նրա տեղեկացմամբ` բնապահպանական փորձաքննությունը վստահվել է բրիտանական հեղինակավոր կազմակերպությանը, որը 300 տարվա պատմություն ունի եւ բարձր է գնահատում սեփական իմիջն ու հեղինակությունը:Իսկ մինչ այդ տեղացի փորձագետները քաղաքապետին ներկայացրել են, որ ոչ մի լուրջ բնապահպանական խնդիր ոսկու հանքավայրի շահագործման հետ կապված չի առաջանա: «Ուրանի մասնագետների հետ ենք խոսել, որոնք ֆիքսել են, թե Հայաստանում որտեղ ուրան կա, իսկ Ամուլսարը դրանց մեջ չէ: Իսկ եթե փոշու խնդիրն է, մեզ ապացուցում են, որ փոշին 1 կմ հեռավորությունից չի անցնում: Պայթեցման խնդիրներ կան, բոլոր խնդիրները քննարկել ենք, հանրապետության նախագահին էլ խնդրել ենք, որ բնապահպանների ու մասնագետների հետ հետամուտ լինեն»,- ասաց Ջերմուկի քաղաքապետը:
Նշենք, որ Ամուլսարի ոսկու հանքավայրի շահագործման իրավունքը տրվել է կանադական Lidian International ընկերությանը, որի շահերը Հայաստանում ներկայացնում է Գեոթիմ» ընկերությունը: Ըստ վերջին հետախուզական տվյալների` Ամուլսարում առկա է 40 տոննա կամ 1.4 մլն ունցիա ոսկու պաշար: Հանքը նախատեսվում է շահագործել բաց եղանակով: Lidian International-ի բաժնետոմսերը գնանշվում են Տորոնտոյի ֆոնդային բորսայում (Կանադա): Ընկերության գլխավոր բաժնետերը IFC միջազգային ֆինանսական կորպորացիան է:
|
