Հայաստանի կառավարությունը դրական է գնահատում երկրում ձկնաբուծության զարգացումը, ինչը խթանում է ոչ միայն տնտեսական աճը, այլև արտահանումը:
Սակայն Արարատյան դաշտավայրի ջրային պաշարների մեծ մասը անխնա օգտագործման հետևանքով չի վերականգնվում, իսկ Արարատի և Արմավիրի մարզերի շատ գյուղերում ցամաքում են խմելու և ոռոգման ջրի աղբյուրները:
Միաժամանակ ձկնաբուծությունը շարունակում է զարգանալ. գյուղնախարարության տվյալներով` եթե 2010-ին արտադրվել է 5420 տոննա ձուկ, ապա այս տարի, մոտավոր հաշվարկներով` նախատեսվում է ունենալ 7000 տոննա: Ընդ որում, ոլորտում արձանագրված աճը նպաստում է նաև գյուղատնտեսության ոլորտում վերջին տարիներին արձանագրվող անկման կրճատմանը: | 
|
Արարատյան հարթավայրում գործող 234 ձկնաբուծական տնտեսությունները տարեկան 800 մլն խմ ջուր են արդյունահանում, ինչի հետևանքով ցամաքել են հարթավայրի ավելի բարձրադիր գոտիներում գտնվող արտեզյան աղբյուրները:
Արարատի մարզի Հովտաշատ համայնքի ղեկավար Սիմոն Անդրեասյանի փոխանցմամբ` գյուղում տնտեսավարող 35 ձկնաբուծարանների գործունեության հետևանքով Հովտաշատի 130 աղբյուրներից 110-ն արդեն ցամաքել են, ինչի պատճառով գյուղի 1040 հա հողատարածքներից 700 հա-ն չի մշակվում, իսկ 1300 գլուխ անասունից մնացել է 500 գլուխ:
«Մեր գյուղում 1040 ընտանիք է ապրում, 3500 մարդ, ու ոչ մեկը գյուղը չի լքել, ոչ մի դուռ փակ չէ: Բայց այս մարդիկ չեն կարողանում մշակել իրենց հողը, խմելու և ոռոգման ջրի աղբյուրները ցամաքել են, դաշտերը չորացել են, խոտ չկա, ստիպված մորթել են նաև իրենց անասունները, ու այս ամենը ձկնաբուծարանների պատճառով»,- «ԱրմենիաՆաուին» ասաց Անդրեասյանը:
Համայնքապետի թվարկած խնդիրներին բախվել են Արարատյան հարթավայրի բարձրադիր գոտիների գրեթե բոլոր գյուղերում: Կառավարությունն իրավիճակն ուսումնասիրելու և հարցին լուծում տալու համար անցյալ տարի կառավարական հանձնաժողով էր ստեղծել:
«Արարատյան դաշտավայրի ջրային պաշարները վերջին 2-3 տարիներին լրջորեն նվազել են, և դա խնդիր է: Սակայն ջուրը միայն ձկնարդյունաբերության համար չէ, նաև խմելու և ոռոգման համար է»,- խնդրի ուսումնասիրությունից հետո եզրակացրել էր կառավարական հատուկ հանձնաժողովի նախագահ, տարածքային կառավարման նախարար Արմեն Գևորգյանը:
Հատուկ հանձնաժողովը պարզել էր, որ Արարատի մարզում 87 ձկնարդյունաբերական ձեռնարկություններից միայն 27-ի տարածքներն են ջրային նշանակության, մնացածը արդյունաբերական կամ գյուղատնտեսական նշանակության են: Արմավիրի մարզի 147 ձեռնարկություններից և ոչ մեկի տարածքը ջրային նշանակության չէ:
Պարզվել էր նաև, որ հանրապետությունում առկա են մոտ 5424 խորքային հորեր, որոնցում հիմնականում ջրաչափական սարքավորումներ տեղադրված չեն: Ուստի, որպես խնդրի լուծման մի մաս` կառավարությունը որոշել էր, որ արտեզյան յուրաքանչյուր հորի համար պետք է ջրաչափ տեղադրվի` ջրի օգտագործումը կառավարելու համար:
Օգոստոսի 17-ին Արմավիրի մարզ կատարած այցելության ընթացքում բնապահպանության նախարար Արամ Հարությունյանը նշել էր, որ տնտեսավարողներն իրենք պետք է ձեռք բերեն ջրաչափերը:
Խնդիրը, սակայն, միայն ջրաչափերի տեղադրմամբ չի լուծվելու, համոզված է Հովտաշատի գյուղապետ Սիմոն Անդրեասյանը.
«Այսպես հնարավոր չէ, որ 300-400 մարդ` ձկնաբուծարանների տերերն ու նրանց ընտանիքները, իրենց լավ զգան, դառնան իշխան ձուկ ու ջրում լողան, իսկ հազարավոր մարդիկ դրանից տուժեն»:
|
