Գլխավոր էջ » 2011»Օգոստոս»4 » Հրազդանի երկաթի հանքավայրի շահագործումը կարող է մասնակիորեն ջրազրկել Երևանը
14:42
Հրազդանի երկաթի հանքավայրի շահագործումը կարող է մասնակիորեն ջրազրկել Երևանը
- Ինչպե՞ս կարելի է նույն երկրում, այս փոքր տարածքում տուրիզմի հույս ունենալ, տուրիզմ զարգացնել, մաքուր գյուղատնտեսություն զարգացնել` կողքը հանքեր բացելով,- «Ազդակ ակումբում հրավիրված մամուլի ասուլիսում ասաց «Հանուն կայուն մարդկային զարգացման ասոցիացիա\ ՀԿ-ի նախագահ, աշխարհագրական գիտությունների դոկտոր Կարինե Դանիելյանը:
Այս հարցի պատասխանը թերևս բոլորին էլ հայտնի է` հնարավոր չէ: Եթե տրված թույլտվությունները չեղյալ չհամարվեն ու սկսվի Տաթևի համալիրի մոտ գտնվող մետաղական հանքավայրի, Ծաղկաձորի, Հանքավանի, Արզաքանի հանրահայտ հանգստավայրերից ոչ հեռու գտնվող Հրազդանի երկաթահանքի, ինչպես նաև բնակավայրերին և հանգստավայրերին մոտ գտնվող այլ հանքավայրերի շահագործումը, մի որոշ ժամանակ անց արտերկրի զբոսաշրջիկները գլխի կընկնեն, թե ուր են գալիս: Դրանից հետո նրանցից շատերը դժվար թե գան մի երկիր, որի գրեթե ամբողջ տարածքը ծածկված կլինի հանքավայր-խոցերով:
Կ. Դանիելյանը ընդգծեց, որ հանքավայրի ճանապարհն անցնում է հենց այդ տարածքով, և Տաթև այցելող զբոսաշրջիկների հենց կողքով անցնելու են ծանր մետաղներով, հանքաքարով լցված բեռնատարները:
Սակայն զբոսաշրջիկների հոսքի նվազելը երանի թե միակ վտանգը լինի:
- Հրազդանի օդային ավազանն առանց այդ էլ աղտոտված է փոշով, և այստեղ կավելանա նաև այդ փոշին, որն ուղղակի տոքսիկ փոշի է, որովհետև պարունակելու է ծանր մետաղներ, այնպես որ այդ առումով քաղաքի համար վտանգը մեծ է,- ասաց Կ. Դանիելյանը:
Նրա հավաստմամբ` վտանգ է սպառնում նաև Երևանի խմելու ջրին, մայրաքաղաքը կարող է կորցնել իր խմելու ջրի մինչև 40%-ը, քանի որ բացարձակ հաշվի չեն առնվում, թե ինչ փոփոխություններ կարող են լինել երկրի ընդերքում: Մինչդեռ Հրազդանի, ինչպես նաև ոչ հեռու գտնվող Աբովյանի հանքավայրերի տարածքներում է ձևավորվում Երևանի խմելու ջրի աղբյուրների մի մասը:
- Մեծ է վտանգը նաև Հրազդան գետի համար, որովհետև բավականին մոտ է գտնվում, և այստեղ ծանր մետաղներով գետի լրացուցիչ աղտոտվածություն կլինի,- ասաց նա և հավելեց, որ դրա հետևանքով կաղտոտվեն նաև Արարատյան դաշտը և այն սննդամթերքը, որը ոռոգվելու է այդ ջրով:
«Ազդակի\ մյուս հյուրի` «Անտառները սերունդներին\ ՀԿ-ի նախագահ, Հրազդանի բնապահպանական հասարակական կազմակերպությունների ֆորումի ներկայացուցիչ Մովսես Մանուկյանի հավաստմամբ` Հրազդանի երկաթահանքի տեղադիրքն արդեն իսկ բավական է, որ լուրջ վտանգներ լինեն:
- Բլուրը, որի մեջ ամփոփված է հանքաքարը, գտնվում է Հրազդան քաղաքի ուղիղ կենտրոնում,- ասաց Մ. Մանուկյանը և ընդգծեց, որ դպրոցն ու բարձրահարկ բնակելի շենքերը հանքավայրից ընդամենը 1-2 կիլոմետր են հեռու:
Պատասխանելով մեր հարցին` Կ. Դանիելյանը ասաց, որ եթե խնդիրն, այնուամենայնիվ, չլուծվի, հնարավոր է, որ մի շարք հասարակական կազմակերպություններ միավորվեն ու Հրազդանի երկաթահանքի շահագործման առնչությամբ դիմեն դատարան:
- Մեր կարծիքով, առնվազն 5 տարի պետք է դադարեցնել նոր լիցենզիաները, պետք է ուսումնասիրել, էկոլոգիական ինվենտարիզացիա անցկացնել, այսօր մոտ 460 գործող լիցենզիաներ, հանքեր ունենք, և մոտ 280-ն ընթացքի մեջ են, աշխարհի այս մի փոքր կտոր տարածքը, որ մեզ տրված է, ուղղակի լրիվ խոցերով ծածկում ենք,- ասաց աշխարհագրագետը:
