Գլխավոր էջ » 2011»Օգոստոս»10 » Ըստ առողջապահության նախարարության տվյալների` Քաղսի եւ Սոլակ գյուղերում աղիքային համաճարակ չկա
14:43
Ըստ առողջապահության նախարարության տվյալների` Քաղսի եւ Սոլակ գյուղերում աղիքային համաճարակ չկա
Կոտայքի մարզի Քաղսի եւ Սոլակ համայնքներում համաճարակային իրավիճակը հանգիստ է: Այս մասին «ԷկոԼուր»-ի հարցմանն ի պատասխան տեղեկցնում է ՀՀ առողջապահության նախարարությունը: Հարցումն արված էր նրա հիման վրա, որ մաքրման կայանի չգործելու հետեւանքով Հրազդան, Ծաղկաձոր քաղաքների ու հարակից համայնքների կոյուղաջրերը թափվում են Հրազդան գետ եւ մնում Քաղսի գյուղի տարածքում: Այդ ջրերով գյուղացիները ոռոգում են իրենց հողամասերը:
ՀՀ առողջապահության նախարարության աշխատակազմի ղեկավար Սուրեն Քրմոյանի ստորագրությամբ օգոստոսի 6-ի ՍՔ/7155-11 նամակում ներկայացված են 2008-2011թթ. Սոլակ եւ Քաղսի համայնքներում սուր աղիքային հիվանդացության ցուցանիշը: Ըստ նախարարության տվյալների` այս տարիների ընթացքում համայնքերում չեն գրանցվել որովայնային տիֆ, պարատիֆ, սալմոնելոզ, դիզինտերիա, հայտնի էթիոլոգիայի աղիքային վարակ, վիրուսային հեպատիտ Ա հիվանդությունները: Միայն գրանցվել է անհայտ էթոլոգիայի աղիքային վարակի մեկական դեպք 2008-2011թթ. ընթացքում երկու համայնքներում: Միակ գերազանցումը եղել է 2010թ.` անհայտ էթոլոգիայի աղիքային վարակի 3 դեպք Քաղսի համայնքում:
